لا شئ يعجبني
منار عبد الهادي
و أنا لا شئ يعجبني
ما عاد في العودة شئ يغريني بالبقاء
ننشق وننسلخ من أرواحنا اشتياقا ثم ننشق ونجلد أنفسنا ندما
:بيعاودوا ليه يا سيدي ؟
: خايفين ليكونوا فاتوا حاجة وراهم مخدوهاش
:وليه الوعد لما اللي بيعاود بيعاود لجل ينهش بيوعدوا ليه ؟
: طب قوليلي لما اللي عاود عاود فتحتيله الباب ليه وخدتيه بالحضن كنك لانجرحتي ولا انسلختي ولا بكيتي …ردي ردت المية فزورك
: كنت خايفه أكون فوت حاجة ورايا
:بتلومي عليهم ليه عاد ….عاودوا ينهشوا وعاودتي تلمي سيان يا بتي سيان
:لاه يا بويا فرق كبير أنا بعاود عودة أمل كيف العيال لما ينفخوا بلونه وتفرقع ينفخوا غيرها يمكن يفرحوا بيها ….أنا بيبقى نفسي أفرح يا سيدي لا بضمر لحد شر ولا بوعد باللي مقدرش أصونه
فرق كبير يا سيدنا
هما بيعاودوا وهما عارفين إنهم راجعين غدر .
اللي راجع راجع شبعان يا سيدنا وجي يبيع ويشتري فينا غناوة
راجع وعارف إنه وعده مش وعد حر …وعد زيف
: وفكرك العيب فمين يا بتي ….عاللي بينفخ و لا اللي مصانش ؟
:تقصد إيه يا سيدنا
:العيب فاللي مشافش العيب يا بتي ، كنت فاكرك أوعى من إكده
كنت فاكرك وعيتي وفهمتي العيب فين
العيب فيكي ….اللي ينفخ مره والتانيه وميلاقيش فايدة ميوجعش قلبه ف نفخ فاضي
في حجات تستاهل نتعب قلوبنا فيها
وحجات نفرط فيها بالسهل
فرقي يا بتي بين اللي شاريكي واللي مفرط فيكي بالساهل
إوعاكي تنفخي وتوجعي قلبك ف رخيص
قلبك غالي يا بتي والغالي ميروحش بلاش
سكتي عاد؟
:نفسي مقطوع يا سيدنا تعبت
:يبقى تكفي كلام يا بت قلب النور …وميلي علي رجلي لجل أرقيكي
#مولانا_العاشق
#منار_عبد_الهادي
