رؤية وابداع
وحشتيني
وحشتيني
بقلم: شيماء الشربيني
وحشني بيتنا الكبير
ووحشني ألاقيكي
وبفوق لنفسي كتير وأنا رايحه أناديكي
أقول بقلبي خلاص .. ويا رب إرحمها
بعد اما كنت بقول : يا رب خليكي
يا مأسسه فالدار حنيه وسعاده
يا أمي رحمة ونور عليكي بزياده
حاجتك أهي كلها لساني شيلاها
فَرشة ماليها الهنا وسبحه وسجاده
وصوره وانت بتضحكي ويانا من قلبك
زي القمر والنبي ،، وجميله كالعاده
يا أصل كل الدفا
يا سر لمتنا
أجمل سنين عمري .. أنا عشتها فبيتنا
ولما مشينا طريق .. فرشتيهولنا أمان..و يادوب بدعوة رضا ..نورتي سكتنا
نقطه .
وسطر جديد .. وهاكتبه لواحدي
سامعه الملاك بيقول :
هاتشقي .. تنسعدي
مفيش دعا أمك.. علي نفسك اعتمدي
رحمة ونور بلا عدد
علي اللي كانت زاد
وطريق وصحبه وسند
عليكي يامُ البنات
عليكي يامُ الولد
يا مجمعه الغايبن
ومونسه القاعدين
وأغلي حب اتوجد
#شيموفرينيا
بقلمي : شيماء الشربيني
إتبعنا
