اتولدت من جديد
بقلم /أم هاشم العيسوي
أنا بمحبتك اتولدت من جديد
اسأليهم كام من مرة قبلك
شافوني فيها بضحك من جوايا وسعيد
عرفت معاكِ للحياة طعم ولون
لو هكتب كتب في حبك
الورق هيخلص وأنا لسه
بغازل فيكِ زي المجنون
وفي لحظة فرح بتجمعنا
حاسس إن جوايا أبيض
إن جوايا طفل بريء بيتولد
وقصة حب جميلة بتقربنا
وبكل مشاعري عليكِ بتسند
ما أنا عاشقك للنهاية مهما الظروف تطوحنا
قالوا الحب له علامات
وأنا قلبي من أول نظرة
سلم على قلبك كتير سلامات
ما أنا قلبي برضوا له نظرة
والعيون بتحكي مش بالحروف
دي بتحكي قصص حكايات
فقوليلي ازاي أبطل أدمنك
أنا قلبي سلمته ليكِ
وعليه بحلفك وبأمنك
وبقولك شبيك لبيك أنا بين ايديكِ
ويالا نقول جيم أوفر لكل الحساد
ما أنا في حبك جبل ما يهزه ريح
وراسي حجر وقلبي كله عناد
وفي وقت ما بتزعلي مني
سهم الحزن بيوقعني جريح
أصلهم علموني الوفاء من صغر سني
فاوعي تزودي جرحي بضغطه على الزناد
قلبي شاور وقال هي وبس
لا قبلك داق طعم الحب الحقيقي
ولا غير حبك حن وحس
وفي نظري بنت الأكابر
ما أنا مش هداري محبتك
دي عيوني فضحاني ف ليه هكابر
بكره الأيام تجمعنا على خير
واديني بنام وبحلم ومش صابر
عيوني لحظة لقانا من عشقك بتلمع
نفسي اصرخ بعلو صوتي
وكل العالم تفهم وتسمع
إن حبك دم شراييني
وإن اللي بينا حالة عشق
يا محبوبة كل اللي فات واللي جاي من سنيني
