غير البنات
بقلم بيشوي عاطف
قالوا ف وصف العود
أوتاره فيها الطرب
والسر ف النوتة
وانا قلبي عازف عود
بيدق مزيكا والسر بنوته
كامل الأوصاف فتني
والعيون السود خدوني
عبدالحليم مغلطش
والقلب مبيكدبش
يوم لما قال هي ..
هي الي هتكونلي
شمسي ونهاري وليلي
ضحكي ودفا وأُنسي
يا قصيدة متألفه
من بيرم التونسي
مانتي اساس الشعر
والوزن والقافيه
ياام العيون كافيه
يتقال عشانها بيوت
ياام القوام مظبوط
بكتبلك الأتي :
لو كنتي غاويه العزف
انا قلبي دة نياتي
لو كنتي غاويه الغُنا
سااهل .. هغنيلك
لو يوم بكيتي لسبب
ف ايديا منديلك
لو كنتي غاويه السهر
حسهر عشان خاطرك
والله مش بفرح
غير لما اشوف صورتك ..
عارفه لو فكرت مثلا
ان اكتب شئ ف وصفك
كنت هقول عليكي أنك
زي قصيدة لعنترة
او هقول انتي حلوة
زي حتة سُكرة
او هقول ان انتي نجمه
وف سماكي منورة
لو هجيبلك يوم هديه
يبقي وزنك جوهرة
دة لانك بنت جدعه
بنت تقدر تحتويني
وقت حزني وانكساري
وانتي اول حد يفرح
لما بيشوف انتصاري
انتي غير كُل البنات
الي قلبي ف عُمرة شافهُم
انتي خارجه عن المُقارنه
دة لأن مفيش مُقارنه
بين جمالك أو جمالهم