نصيحة أم
بقلم/أم هاشم العيسوي
جايه دلوقتي تصارحيني وتقولي انك بتحبيه
طب ازاي عقلك جابك
ومنين وامتى كنتي تعرفيه
مش دا اللي كان في يوم سابك
ثم انه فيه فرق بينك وبينه
ولا صحيح مراية الحب عاميه
ضحك عليكي بكلمتين حب وغرام
وهو كله ع بعضه
مش فعل يا بنتي دا كلام
عاجبك فيه المظاهر والسلسة اللي رقبته
الراجل يا بنتي بتعرف
من كلمته وهيبته
وكل دا شكل وصوره
اما انتي بنت الحسب والنسب
انتي السنيوره
يا خسارة دلعي ليكي
لما كنت اشيلك بالساعات ع كتافي
لما كنت بناديكي بالاموره
دا مش بيحبك بقلبه وانتي عمرك ما ملكتيه
دا حبك بعينه وعينه والله عوره
طول عمرك في حمايا ولا كنتي بتخافي
ما هو لو كان اد كلامه كان دخل البيت من بابه
ولا اكمنه لايف ع البنات
ومن كترهم تاه في عنوان احبابه
انا شايف انك بتوهمي نفسك
ما الطريق المشبوه بتكتر كلابه
وانتي طريقك كله نور
وتمن تربيتك دهب ميقدرش هوا ع حسابه
ويوم ما اجوزك لازم يكون راجل غيور
يخاف عليكي
ما هو الجواز مش بالمظاهر والقصور
الجواز حياة لازم فيها توافق
والا بلاها ونكفي على الخبر مجور