عصفور محبوس

بقلم:سلوى صبح

عصفور حبيس القفص
متكسر الجناحات
زقزق بصوت مجروح
مايل إلى الهمسات
دا كان طليق في الهوا
بيناطح السموات
سابح في ملك الله
تغريده تسبيحات
وبيلقط الحَب حبة حبة
بمنقاره وبابتسمات
يجري ويتنطط قلبه سعيد
وما في سُكات
وفِي لحظة صاده القدر
ورماه ممسُكات
قلبه اتكسر واترمى
جوة القفص لساعات
وبعد كل الهنا
بقى تغريده آهات
حُزنه إتولد أد البلد
وكإن سعده غاب
قال للنصيب والقدر
ممكن تفتح لي الباب
لحسن أموت جنبك
أصل الهوى غلاب
رد القدر بهدوء
كل النصيب مكتوب
اصبر على ألمك
وأرضى بكل كربك
وإن تُبت عن ذنبك
وظهر لله ندمك
تتطلع في يوم شمسك
وتنول حرية قلبك
طأطأ راسه وقال
يارب إنت رحيم
وبحزن قلبي عليم
وحيلتي إيه يا غفور
غير الدُعا وصلوات.