من غير كلام

سلوي صبح

من غير كلام

كل الكلام

أصبح حرام

بس الفعال هي الحلال

في زمن اللئام

مطلوب عمل

مطلوب أفعال

مش اشتغالة وانشغال

بالرفض والإنكار

أو ادعاء السلام..

استباحة

دم الأطفال

قصاد رجولة الأبطال..

ستات عفيَّة

أطفال بريئة

ورجال قوية

قصاد جرائم

مش سوية ….

هو البشر بقى صيد خلاص

زي الطيور البرية..

جوه قفص قصف ودمار

وتسموا ده

دفاع عن النفس وحرية؟

يا عقول أبية

وقلوب قوية

ع الانكسار

تحت الرماد

عايشة وذكية

تحت الحصار

مالوش نهار..

أقسم لكم بكرة

راح يطلع النهار

ويمسح كل عار

وينتفض شعب العروبة

اللي دخل جحور الغلابة

وهزمه ضعفه وتخاذله

وكل ليل مظلم غطيس

فجره بكرة راح يكون

ضوءه انتصار..

بالله عليكم تخرسوا

أيوه اخرسوا

صحيح إن الصمت عار

لكن الكلام في الوقت ده

خيبة ودمار

وهقول لكم بالاختصار

يا رجول ومساندة بجد

يا هزيمة العجز

وراها ذل وعار.