محمد عدوية يكشف ليارا أحمد عن تفاصيل عمل والده الجديد

كتبت : نهى وجدي

 

كشف الفنان المطرب محمد عدوية عن ردود أفعال آخر أعماله الغنائية “قبطان سفينتي” وعن أعماله المقبلة مع الإعلامية يارا أحمد والذي يعرض على قناة هي يوم الجمعة من كل أسبوع.

 

 

 

 

حيث قال محمد عدوية ل”يارا أحمد” عن ردود الأفعال: الحمد لله الواحد بيجتهد ويعمل اللي عليه وبيعمل حاجة جديدة وفي الآخر بيستنى رد فعل الناس، والحمد لله في ردود فعل حلوة بس أنا مبحبش أتكلم على الكلام ده وأخلي الناس هي اللي تحكم.

 

 

 

 

ورد بسؤاله عن تعليق أحد المتابعين له إنه بعيد عن التريند، قال: أنا بحب دايمًا أعمل مختلف ومبيهمنيش اللي هو هيعمل ايه وبحب أعمل حاجة تعيش.

 

 

 

وعن تحضيره لأغنية جديدة مع والده الفنان أحمد عدوية، قال: ده الأستاذ الكبير بتاعنا ده الأسطورة،بنعمل حاجة بس لسه بنشوف الكلام بتاعها اللي هيليق وبنشوف اللحن لسه تحت ورشة عمل.

وعن أكثر شيء تعلمه من والده، أوضح قائلًا: إبقى نفسك وخليك نفسك أهم حاجة تبقى أنت ليك الهدف والحلم بتاعك اللي إنت مقتنع بيه مش مهم هيعمل إيه ومش مهم هينجح بإنهي طريقة مش مهم هيوصل لغاية فين إنت تصدق حلمك أهم حاجة، متابعًا: ده التارجيت بتاع الأستاذ طول عمره كان هو لما طلع في وسط السبعينات والستينات كان في العمالقة طبعًا الأستاذ عبد الحليم والسيدة أم كلثوم طلع هو بلون مختلف وفضل وراه لغاية مابقى أحمد عدوية.

 

 

 

وعن تجربته برفقة والده أحمد عدوية ومحمد رمضان، قال: محمد ممثل موهوب جدًا وهو موهوب ومجتهد بصراحة الشخصية دي مجتهدة جدًا وربنا يوفقه

 

 

 

 

وطبعًا كانت حاجة حلوة جدًا وكانت خطوة جميلة إن إحنا التلاتة نجتمع في عمل واحد لإن من حسن حظي إني أبقى مع أبويا الاسطورة بتاع الغناء الشعبي ومعايا محمد رمضان طبعًا رمضان ربنا يحفظه بني آدم بردو مجتهد جدًا فكانت حلوة طبعًا وربنا وفقنا فيها.

 

 

 

وأعلن عن أعماله المقبلة وقال: بحضر لأغنية تانية بس نخلي دي بس تاخد وقتها شوية أنا بحب أدي كل حاجة حقها في السمع مش مستعجل على إنها تتسمع بسرعة أهم حاجة تاخد وقتها في سمعها.