يُسرا عن دورها في أحلام سعيدة لـ رؤية وطن: “كان نفسى أعمل حاجة خفيفة وأخرج برا التراچيدي”
حوار/ منار عبد الناصر
في مسلسل أحلام سعيدة كان معايا كاست رائع وكوميديانات مهمين
الحلقة الأولى في مسلسل أحلام سعيدة كانت بالنسبالى فرشة كبيرة للتعرف على طبيعة الشخصية
الفن المصري هو من أعرق الفنون في المنطقة العربية
حوار اليوم هو حوار قوى ومميز؛ فقط لأنه مع نجمة من العيار التقيل، نجمة لها تاريخ كبير فى السينما والدراما المصرية، لها كم هائل من الأعمال فى ارشيفها الفنى
دايما حريصة على اختيارها لنوعية أعمالها اللى بتقدمها بتتميز فى التراچيدى، وبتتألق فى الكوميدى.
الحقيقة إنها عودتنا على تواجدها فى مواسم شهر رمضان، والسنة دى بتشارك فى عمل مختلف
هو مسلسل من الذ وأخف المسلسلات اللى بتتعرض على الشاشة، بالمشاركة مع عدد مميز من نجوم الكوميديا وهو مسلسل احلام سعيدة.
ضيفتنا هى النجمة الكبيرة يُسرا واللى شهرتها “سيڤا” وكان لموقع رؤية وطن حوار مميز عن دورها فى مسلسل احلام سعيدة وكواليس العمل، واليكم نص الحوار:
في بداية الحوار ايه اول انطباع عن دورك في احلام سعيدة عند قرأتك للورق ؟
أول انطباع انى مكنتش فاكرة إن دور ممكن يضحك لكن الحمدلله المواقف اللى كانت مكتوبة قدرت تعمل كده، خصوصًا فى الحلقة الأولى بالنسبالى؛ لأن الحلقة الأولى بالنسبالى انتى مبتشوفيش غيرى تقريبا يعنى كانت فرشة كبيرة أوى ليا علشان تعرفى الشخصية دى ايه وعايشة ازاى وبتفكر ازاى وبتلبس ازاى وايه هواياتها وايه تاريخها، فـ كنت قلقانة جدا أنه الحلقة الأولى كانت كلها أنا، بس الحمدلله ربنا عداها على خير.
كيف كانت تحضيراتك لشخصية فريدة؟
حضرت لشخصية فريدة طبعا مع أستاذ عمرو المخرج وهالة السيناريست وقعدنا واتكلمنا وبالصورة اللى هى كتباها تقدرى تستوعبى نوع الشخصية دى عايشة ازاى ومرتبة حياتها ازاى وسيستماتك ازاى ولبسها وشكلها ايه وبتاكل وتشرب ايه كل ده.
ما هي معايير حضرتك للموافقة على المشاركة في العمل الفني ؟
معاييرى انى اعمل حاجة جديدة ومختلفة وتناسبنى يعنى، دى معاييرى اعمل حاجة مختلفة وناجحة، فـ أنا لما حسيت إن ممكن ده يحصل علطول بختار حاجة على الأقل معملتهاش قبل كده.
كيف كانت كواليس تصوير مسلسل أحلام سعيدة مع كاست العمل؟
الكواليس كانت من أعظم الكواليس اللى ممكن تشوفيها؛ لأن معايا كاست رائع، معايا كواليس رائعة، معايا منتج جامد، مخرج جامد، معايا ممثلين جامدين جدًا جدًا وكوميديانات مهمين جدًا جدًا، فـ لا أنا محظوظة انى عندى كواليس رائعة كده.
من وجهة نظر الفنانة الكبيرة يُسرا..ما هى عوامل وجود واستمرار أى فنان؟
إن هو يغير ويواكب العصر ويعرف لازم يتكلم فى ايه وامتى كل الكلام ده.
من خلال مشاركة حضرتك في لجنة تحكيم برنامج الدوم..ما رأي حضرتك فى المواهب الفنية المصرية ؟
اشتراكى في الدوم أنا كنت في المرحلة الأولى ودى مرحلة أسهل من أى مرحلة تانية، فـ الحقيقة شوفت مواهب كويسة جدا ممكن تبقى ليها مستقبل كبير، بدليل إنهم اختاروا متين وحاجة موهبة يعنى مختاروش حاجة قليلة، فـ بتمنالهم التوفيق لأن فعلا فعلا يستاهلوا ياخدوا فرص فى حياتهم.
بتفضلى الدراما الكوميدية ولا التراجيديا؟
الحقيقة كـ ممثلة بحب أعمل كل حاجة، بس الكوميدى أصعب بكتير من التراجيدى وعشان تلاقى نص كوميدى ده مهم انك تلاقى نص حلو.
من خلال مسيرة حضرتك الفنية ممكن تعرفى الفن المصري بـ ايه ؟
أعرفه إنه أعرق نوع فن فى السينما أو المسرح أو فى أى حاجة فى المنطقة العربية، هو أم الفن.
لو هتقولى جملة تشويقية للجمهور عن باقى احداث المسلسل تحبى تقولى ايه ؟
لا أنا مبقولش جُمل تشويقية للجمهور، بحب الجمهور هو اللى يشوف ويتوقع وبعد كده يعرف حصل ايه.
هل تحبى توجهى رسالة لاي حد من خلال حوارنا؟
أنا بشكر جمهورى جدًا، هبعتله هو رسالة وبقوله إن انا سعيدة جدًا بردود الأفعال اللى حاصلة بالنسبة للمسلسل وأنا كان نفسى أعمل حاجة خفيفة علشان انا كمان كنت محتاجة أخرج برا قالب الدراما والتراچيدى.
