ميدو: وأنا صغير كنت بركب ٣مواصلات علشان اتدرب في نادي الزمالك
أميرة الشاذلي
كشف كابتن أحمد حسام ميدو إن النجاح في أي مجال يتطلب الإنضباط والإلتزام، لأن مفيش أي حاجة سهلة وعلشان نوصل لأي مكان لازم نحاول ونقع ونقوم ونواجه،ونبقى عارفين هنقابل ناس تحبط وتوقع وينصحوا نصايح غلط، ومش كل الناس هتساعدك ولا هتحبك.
قال “ميدو” خلال برنامج “أنا وهو وهي” المذاع على قناة “صدى البلد”:
“نصيحتي لأي حد ولأولادي إنهم يقاتلوا على حلمهم ويبقوا أقوياء وأذكياء لأن الموهبة مسؤولية، وأنا صغير كنت بركب ٣مواصلات علشان أروح تدريب نادي الزمالك”
تابع:
“لو سألت أي ست في الدنيا مين الراجل اللي ممكن تنجذب إليه، هتقولك إلى يقعد مع البيه يبقى بيه، ومع راجل الشارع يبقى زيه ويعرف لغتة، وأنا و يسرا زوجتي مربين أولادنا على كده”
واستكمل:
“أولادي علي وهاشم وحسين، علي عنده ٢٠سنة وشغال كويس مع نادي الزمالك، وحسين ١٦سنة وبيلعب كرة في فيوتشر وقريب هيروح نادي الزمالك، وهاشم ١٥ سنة،أنا بشوف إن غلطة كبيرة إن أي لاعب كرة يحط ابنه تحت ضغط، أنا سايبهم يشتغلوا ويتعلموا من أخطائهم، طريق الكرة صعب وفيه منافسة كبيرة جداً وضغط ومسؤولية على الأولاد، وضروري تكون فيه المنافسة شريفة”
